cross-skiing-890p.jpg

 

Arpannerup allaaserineqarnera

Arpaffik inississimasarpoq alianaalluinnartumi Sisimiut timaatungaani qaasuitsup killeqarfiata 65 km avannarpasissusiani. Ulluni pingasuni nuna alianaatsoq, allangorartoq ilaatigullu pikkunavissoq peqataasut aqqusaartussaavaat. Uuma saniatigut arpannerit aallat marluk aamma aaqqissorneqartarput tassaasut arpanneq 100 km isorartutigisoq, aammalu Miki ACR meeqqanut inuusuttunullu assigiinngitsunik isorartussusillit.

race-start2-430p.jpg

Arctic Circle Race-imi
pinngorittamik eriaginninneq

Arctic Circle Race-imi siulersuisut ACR-i ussassaarutigisarpaat avatangiisinik atuilluartuusutut unammisitsinerusoq. Eqqakkat atukkallu killilersorniartuarneqarput pisariaqanngitsumillu atuinaveersaarnikkut. Ukiut tamaasa arpaffiup inissisimanera assigiikannertarmat pingaaruteqarpoq pinngortitap minguitsuutituarnissaa. Nunami mingutsitsineq ersarinnerulersarput aasaraangat.

Europamut assersuutigalugu nunatsinni minguit suujunnaariartortarneri quleriaammik sivisunerusarput. ACR-ip nalaani aamma qimussertut ingiortaasarput sillimaniarnermut tunngatillugu. Aamma snescooterit atorneqartarput assartuinernut assigiinngitsunut.

Unammeqataasutut pinngortitamik eriaginneqataasinnaavutit arpaffimmi tammaarfimmilu maangaannaq eqqaanaveersarnikkut eqqaavinnillu atuinikkut. Aamma qinnuigineqarputit nammineq imerfeqarnissannik imertitsivinni atortagassannik – aammalu nerinermut atortunik tammaarfimmi atugassannik. Pujortartaruit cigaret-ikunik maangaannaq igitsisassanngilatit.

race-start1-430p.jpg

Malittarisassat

Normut tunniunneqartut ikkunneqassapput timip saatungaaniit tunuatungaaniillu takuneqarsinnaatillugit nalunaarsuisuniit. Arpannermi pinngitsoorani classisk atorneqassaaq. Inerteqqutaaq maangaannaq eqqaaneq. Taakkua arlaat unioqqutikkaanni ingerlaannartumik unitsitaasoqarsinnaavoq.

Malittarisassanut allanut tunngatillugu innersuussutigineqarput International Ski Federation Competition Rules for Popular Country Skiing nunat assigiinngitsut akornanni atuuttut.

Piffissalersuineq

Piffissalersuinerit ACR-ip siulersuisuiniit nakkutigineqartarput Kalaallit Nunaani Sisorarnermut Kattuffiup pilersitaanik. Arpaqataasut tamarmik immikkut piffissalersorneqartarput, tamarmillu Arctic Circle Race diplom-imik tunineqartussaallutik. Arpannermik naammassinninngikkui tamanna diplom-imi allaqqassaaq.